History

Idea om jengun-lingwa basi-ney on zuy muhim lingwas de nuy planeta, it un-nem apari in sirke yar 2005. Me bin yuan de Interjenmin-ney Koalision "Pro Humanisma!": http://forhumanism.org/en/

Pa kada-yar-ney konferensa de Koalision oni toki-te mucho om futur de jenley. Oni shwo-te ke sedey-ney komersa-sivilisasion sta pa globale krisa. Konkura, naturale fo komersike sosietaa, it nau bikam yo gwer de oli kontra oli, lo kel es sursa de oli problema. Dabe resolvi oli problema e dabe ausjivi, jenley gro-nidi humanistike transforma. Tal transforma kel ve permiti unisi jenley, weklansi-yen prinsip de komersa kel hi separisi i nasiones i personas. Al diskusi osobitaa de lai-she humanistike transforma, en-ye idea ke jenley ve nidi un osobe lingwa do humanistike integrisa. Inglish es ya klarem lingwa de krisa-ney komersa-ney sivilisasion. Nove sivilisasion ve nidi nove lingwa.

Dwa jen fai zuy-ney interes om futur-ney lingwa de humanistike integrisa: me e Sergei Semyonov. Ta es aika fama-ney leker in Rusia, e ta es may amiga. Nu tuhun kunshwo mucho om zuy generale prinsip de tal lingwa. Poy, wen Lidepla yo janmi-te, S.Semyonov fai bashan pa lidepla: "Basike komponentas de humanistike transforma de sosietaa": http://www.lingwadeplaneta.info/files/hum_eng.pdf

Fon un-ney momenta me samaji-te ke nove lingwa bu gai bi "lingwa de un jen", kreati-ney bay un jen. Pyu-nem, it mus bi lingwa shwo-ney, bu sol skribi-ney. Por to, sun afte begin gun, me go a SPb universitet, dabe shuki helper e kunshwoer. Dar me en-koni tri lingwista kel en-fai interes om nove lingwa e begin ko-gun. Nu studi ye-she proyekta, e nu pri zuy den "Novial" bay Otto Jespersen. Nu pren aika mucho fon Novial (kel, pa suy tur, heredi aika mucho fon Ido e Esperanto), bat sun go dalem fon Novial, bikos Lidepla hev swa-ney prope prinsip. Walaa nuy un-ney tim: http://lidepla.info/en/contact.shtml

Anastasia zwo-te osobem mucho fo Lidepla. Nu trai-te bu sol skribi pa lingwa, bat shwo hi, selekti-yen zuy jamile worda, zuy hao-shwo-ke expresa. Attilio es ga prave wen ta skribi ke Lidepla es "kultiven" lingwa. It gei-te janmi e kresi-te al interakta de pluri jen, e nau sey prosesa kontinu. Duran sertene perioda nu hev-te Lidepla Kluba in SPb. Dar nu shwo-te mucho kun mutu. Me aligi un foto zwo-ney al un mita de kluba.

Krome aktivitaa in SPb, nu fai aktivitaa in internet. Oltaim pyu jen hunti a proyekta e helpi. Olivier Simon, Paul Bartlett, Attilio Liotto (Attilio hi proposi-te nam "Lidepla"), Robert Winter, Konstantin Stolyarov, Stephen Rice, Jens Wilkinson, Risto Kupsala, e mucho otres – pa fakta mucho jen es autor de Lidepla. Lidepla es mucho-autor-ney lingwa, e me joi om to. Eniwan mog hunti a Lidepla komunitaa e influsi for-ney developa de lingwa.

In 2010 Basike Version chu. Depos dan lingwa es ga stabile, bu ye stay shanja de shefe worda.

Generalem, idea de Lidepla es muy simple: tu pren zuy muhim lingwas e unisi li inu un harmonike tota. Es strane ke nulwan zwo-te se bifoo nu. Ye-te simile idea bat li bu realifi-te.